政情：星屑醫生拍劉嗡戰港島
各大黨派就九月立法會選舉嘅部署已經進入最後階段，喺「拉布」戰一役後鞏固咗基本盤嘅人民力量亦滿腹大計，其中喺上年區議會選舉分別追擊立法會議員梁美芬及民主黨副主席單仲偕嘅「星屑醫生」歐陽英傑，將會拍住主席「劉嗡」劉嘉鴻雙雙出戰港島區直選。
劉嗡同星屑醫生兩個都係名校男拔萃嘅出品，由中一識到依家，可謂同聲同氣。星屑醫生喺北角開診所，要偷雞宣傳都比較容易，加上口才好，辯論時一定有貢獻。我哋尋日問過星屑醫生係咪確定出戰港島區，佢話要等人民力量安排，但唯一肯定絕對唔會好似有報道所講，話佢去九龍西獨立參選喎。
劉嗡近日亦已拉埋班義工，日日去港島唔同地點做街站宣傳，一日跑幾場，算係幾勤力。但劉嗡嘅名字同表現始終未為港島選民所熟悉，為咗彌補呢個缺點，出動知名度較高嘅星屑醫生跟隊，相信會對佢選情有幫助。