政情：立會捐血日 議員多失蹤
立法會新大樓尋日首次舉辦捐血日，但參加嘅議員數目仍然維持喺極低水平，只得六人參加，多數係泛民主派議員，而建制派就一個起兩個止，旨意佢哋救人真係死得。第一個去宴會廳捐血嘅係白鴿黨李永達（高達），佢話每年會捐三至四次血，尋日捐咗唔夠十分鐘就搞掂。
高達嘅黨友涂謹申原本都諗住去捐血，但紅十字會職員話佢體內嘅鐵質未達標唔畀佢捐。阿涂好失望話，自己之前捐過六次血都無問題，又自爆成世人都未試過貧血，聽到護士小姐咁講都有啲意外喎。
除咗六位議員外，五十三位議員助理及秘書處職員，同埋十位市民都有響應呢個一年一度嘅捐血活動，撇除一眾尊貴嘅議員，尋日嘅成績算係不過不失啦。話時話，大部分無捐血嘅議員，唔通因為早前通宵應付出缺機制草案「拉布」戰而虛耗過度？