早前因為衝擊替補機制諮詢會（現稱為「出缺機制」）而被判入獄嘅社民連立法會議員梁國雄（長毛），預計會喺明日入獄，尋日佢就喺立法會大會上為在囚人士爭取在囚福利，話當局要求在囚男士每三星期用一卷廁紙係太苛刻。有議員質疑長毛即將入獄，但忽然關心在囚福利有利益衝突之嫌，佢回應話事件純屬巧合喎。
除咗長毛關心囚犯唔夠廁紙用外，亦有議員覺得在囚人士每次淨係可以講三分鐘電話係太少，又有議員批評當局只容許囚犯喺星期六朝早播放卡通片時段睇電視，係漠視佢哋嘅娛樂需要喎。至於曾因偽造文件而被判監三年嘅詹培忠，亦質疑當局唔畀囚犯買即食麵同豉油係虐待佢哋。
保安局局長李少光解釋，向在囚人士定期派發廁紙嘅做法行之有效，如果有個別在囚人士需要額外廁紙，懲教署職員會按需要酌情處理。佢又話，在囚人士對只准傾三分鐘電話無太大異議，仲話如果唔係議員講起，佢都唔知在囚人士對睇卡通片及唔准買豉油感到不滿，聲言會跟進有關安排喎。