政情：白鴿黨七國咁亂等摺埋
本報獨家踢爆民主黨（白鴿黨）南區區議員馮煒光同四名年輕黨員申請做下屆副局長及政治助理後，白鴿黨高層過去一連兩日先後出嚟搞大龍鳳補鑊，除咗聲言要懲罰四隻「乳鴿」外，仲狠批馮煒光「賣黨求榮」，要求革除佢嘅黨籍。馮煒光背叛黨「求榮」當然唔啱，但亦反映咗白鴿黨高層無能，睇唔實啲黨員，先至搞到個黨七國咁亂，一個政黨搞到咁認真羞家，不如摺埋好過啦！
馮煒光被本報揭發叛變後，作為「老鴿」嘅立法會議員無不出盡力水狂轟，而且個個都好似食咗辣椒咁，唔辣嗰句唔講，同之前該黨前總幹事陳家偉到尖沙咀香檳大廈「訪談」出事相比，反映一班老鴿相當憎恨馮煒光。其中李永達就開火炮轟佢「賣黨求榮」，解釋又答得支吾以對，所以決定搵黨友聯署踢走佢，仲話佢做咗咁多年區議員，實力有幾多大家心中有數喎。
張文怒斥馮煒光叛徒
至於向來溫文嘅張文光亦唔留手，話馮煒光言論立場向來都同黨好唔同，但估唔到佢會以行動背叛個黨，仲話呢啲叛徒唔會有運行。而黨團召集人李華明被記者問及，究竟黨內有無黨友幫馮煒光講好說話，點知肥仔明回敬一句：「乜佢有朋友咩？」一句就盡訴心中情。反而平時火爆嘅副主席劉慧卿最留情，話自己身為副主席唔會加入聯署，只係叫馮煒光自己走人算數。
馮煒光被黨友插爆，其實佢自己都要負上部分責任，皆因佢喺黨內人緣向來麻麻，成日要爭選舉權，○八年已經想選立法會，最近又嘈要選超級議席，可惜無乜人投票支持佢。不過，要負最大責任嘅始終係白鴿黨，該黨一班老鴿戀棧權位，搞到第二梯隊無得上位，先至搞到今日嘅田地。
睇嚟該黨要認真檢討吓紀律至得，如果再有黨員被揭發密謀加入政府，該黨九月立法會選舉肯定危危乎，咁就真係離摺埋不遠矣！