中環出更：白先勇大讚港擁創作自由
香港成日被嘲為文化沙漠，但喺台灣當代知名作家白先勇眼中，香港係一個創作自由嘅寶地，對文化界嘅貢獻好大。尋日佢現身香港書獎頒獎禮時，就盛讚香港從未試過禁一本書，喺中、台都試過因政治而禁書嘅年代，香港尊重創作自由嘅精神未變，十分可貴。
七十五歲嘅白先勇，精神飽滿，面色紅潤，今次專程來港為佢嘅新書做宣傳。大師級人物出現，吸引唔少粉絲追星，其中一名忠實讀者特登帶佢嘅名著《臺北人》嚟畀大師簽名留念。本書至少已有廿年，書皮泛黃，連白先勇睇到都好驚喜。白先勇話，香港文壇非常多元化，作家有本地嘅，亦有來自中台嘅，結構複雜，但包容並蓄，難能可貴。
王永平最近「煲」報紙
同場仲有綽號「庸官殺手」嘅前高官王永平，佢被安排頒獎畀港英時代最後一任中央政策組首席顧問顧汝德創作嘅《官商同謀》，但作者就無現身。
本書重點披露當年政府如何與華資商界同謀合作，令民主發展及社會公義賠上沉重嘅代價。淨睇書名已經令人會心一笑，事關同現時人人喊打嘅貪曾行徑不謀而合。
經常不留情面批評貪曾嘅平叔話，自己乜書都會睇，但係最近就睇報紙多啲，因為「好好睇」喎，引起現場一陣大笑。咁係咪因為有好多佢老友嘅消息呢？平叔就面色凝重話：「有啲嘢係笑唔出o架！」諗起貪曾，佛都有火啦！
卓妮