咚咚咚！一年一度嘅端午節就快到喇，又係龍舟鼓響、糉子飄香嘅時候。不過咁，功夫茶想提醒大家，健康要緊，小心病從口入，應節還應節，說話可以亂講，糉千祈唔好亂食吖！
唔係嚇大家，今時今日問題食品氾濫成災，內地毒糉防不勝防，加上港府把關兒戲，稍一不慎，隨時中招！
嗱，可能當局都知衰啦，端午未到先驗糉，又聽吓佢哋點講吖嗱。食物安全中心聲稱喺六十間食肆同食物製造廠抽驗咗一百零五個不同款式同口味嘅糉樣本，結果全部滿意喎。
抽驗樣本全部滿意，聽落就幾滿意嘞，但係咪代表市民食糉百分之百安全呢？答案梗唔係啦！食安中心，顧名思義，令人食不安心，食物安全由佢哋把關，大家都係小心啲好。嗱嗱嗱，深圳當局抽驗市內糉子，喺羅湖一間菜館嘅鹼水糉驗出添加硼砂，貨源來自廣州。大家都知喇，港府嘅把關工作劣迹斑斑，求求其其，港人實在好難唔擔心，廣州毒糉到底有冇流入香港o架？港府今次會唔會又後知後覺，殃及市民o架？
唔好話功夫茶杞人憂天呀，有業界人士透露，本港唔少酒樓同舖頭貪平向內地食品供應商攞貨，質素參差，港人隨時買咗毒糉都唔知。嗱，硼砂無色無味，食咗輕則肚瀉嘔吐，重則中毒致命，唔講得笑o架！港產官僚敷衍塞責，把關失職，如果佢哋自己領嘢，就話自食其糉啫，萬一市民中招，咁就冤哉枉也。
即係咁，內地毒糉為患，港府把關兒戲固然係大漏洞，另一樣令人唔放心嘅就係當局嘅所謂抽樣檢測真係得個樣o架咋！好似佢哋檢測生蠔，聲稱好滿意喎，點知本報一驗就驗出致癌毒蠔；又例如佢哋檢測蔬菜，表示安全咁話，點知環保組織一驗就驗出農藥嚴重超標。
點解會咁？原因好簡單，就係把關官僚十足十好似裹蒸糉入面嘅肥豬肉咁，懶到出汁。最經典嘅例子係，食安中心聲稱檢查過萬幾款食物嘅營養標籤，合格率高達百分之九十九點三，點知畀審計署一腳踢爆，原來佢哋為咗貪方便，只去大型超市抽取樣本，對雜貨店等高風險之地一律視而不見。
同樣道理，如果食安中心驗糉，只係去富豪飯堂、星級食肆抽取樣本，就算結果全部滿意，又有乜意思呢？喂，小市民唔係貪曾，無得傍住富豪黐飲黐食，一般舖頭嘅糉安唔安全先？
講到呢度，功夫茶不得不再提醒港產官僚一次，己所不欲，勿施於人吖，食物安全攸關人命，着緊啲啦，唔該！