貪曾貪腐醜聞屢爆不絕，官商勾結劣行愈揭愈多，其當年以發展國際學校為名，用極優惠條款吸引英國貴族學校哈羅在港建校事件再惹關注。如今租個車位閒閒地都要三千元，卻原來仲有筍盤周街跳！哈羅千元租十四億靚地，還有免息貸款二億七千萬建校，難怪有學者直斥政府用公帑助國際學校「無本生利」，而背後原來貪曾幼子正與哈羅管理公司主要成員邱德根五子邱達強的姪女拍拖，唉，睇怕認得貪曾禮賓府養的是但一條錦鯉，閣下可能都會有意想不到的着數！
話時話，香港寸金尺土，錯！該是尺金寸土，冇理由咁賤租土地㗎？加上「送地送錢」，明益哈羅，廉署唔查，就真係天理難容喇！
貪曾貪到街知巷聞，更成為國際大笑話；之不過咁，「曾朋友」呢位行政會議召集人夏佳理接受傳媒訪問時，竟然觀世音上身，話好同情貪曾，又話貪曾服務香港幾十年，無功都有勞喎。
無功都有勞？《一切都顯而易見：一旦你知道答案》的作者鄧肯．沃茲說：一個好的問題既要有趣，又要可以解答。夏佳理嘅問題可以算「趣」，不過要加多個「怪」字，當然，要解答貪曾「服務」香港幾十年，無功都有勞——老朽只能借已故教育家陶行知題字明心見性：萬分清廉，不過小善；一念貪污，即為大惡。
大惡的貪曾都值得同情？老朽找遍康熙字典四萬字詞，找不到一個可以形容夏佳理何以有咁嘅趣怪諗法！