天文台前台長林超英（黑英）退而不休，繼早前為母校英皇書院抗衡縮班後，近期又為咗保護海岸及中華白海豚，一連兩日喺網誌批評政府力推喺機場興建第三條跑道，其實係服侍鍾意搭私人飛機嘅富豪，最終只會淪為富豪享受，市民難受。唔通黑英暗寸緊一味黐坐富豪私人飛機嘅貪曾？
黑英列舉咗一堆數字，話依家啲民航機載客量愈來愈大，按理客量增加一成，架次唔會增加五成咁多，唯一解釋就係多咗客量極少嘅私人機。
佢批評，政府為咗服務少數富豪，令有「特權」嘅人享受「甜果」，「苦果」就要全港大眾同中華白海豚承受，係「實實在在的重大社會不公義」喎，大家唔能夠接受咁話。
貪曾咁鍾意搭私人飛機，係咪佢為咗明益富豪而大石砸死蟹話要興建第三條跑道真係無人知，但正如黑英呼籲，大家一定要向不公義說不，把握最後機會向環保署署長提交反對意見喎。