政府換屆在即，部分高官就趁七一前輪流放假，有人為咗喺重新上路前抖一抖，有人就希望喺卸任前盡量清晒啲假期。好大機會順利過渡到下屆政府嘅財經事務及庫務局局長陳家強，就喺前日起休假至本月十四日，期間職務由副局長梁鳳儀署任。立法會日前就雷曼事件發表調查報告，身為局長嘅陳家強無受到嚴厲批評，難得成功「甩身」梗要放假鬆番吓啦。
不過，曾經用「雲在青天水在瓶」暗示唔會留任嘅運輸及房屋局局長鄭汝樺（Eva），就會喺十一日至十七日放大假，期間副局長邱誠武會署任局長職務。
Eva一向出名勤力，每朝好早就會返辦公室做嘢，積埋成堆假期放唔晒都不足為奇，趁月尾立法會恢復《一手住宅物業銷售條例草案》二讀前放番一星期大假，都不失為一個好選擇嘅。