政情：盧浩宏難忘食「毒糉」
兩星期後就係端午節，相信大家都會食番兩隻糉應節，好似福苑集團主席盧浩宏（Howard）都唔例外，但食糉就勾起佢童年過端午節嘅難忘回憶。話說佢兒時每逢端午節，嫲嫲都會包糉應節，仲會「加料」落硼砂，令啲糯米變得軟滑。Howard話，當年都食唔少，到大個先知原來硼砂對身體有害，慶幸自己至今健康無大礙，認真好彩。
近日港股直線插水，Howard就話無有怕，皆因佢手持嘅股票全部都係放長線，經得起風浪。Howard話，玩股票首選港股，皆因內地上市公司嘅管理政策立立亂，股市隨時大起大跌，心血少啲都嚇暈，反觀港股較為穩陣，揸長線通常都無甩轆喎。不過，跌市或多或少都會影響市道，唔知經營飲食業嘅佢會否擔心酒樓生意減少呢？