政情:發叔何鍾泰死守立會

九月立法會功能界別議席勢將「大換班」,好多年逾七十歲嘅議員都「被勸退」或退休,但現年七十三歲嘅工程界議員何鍾泰(Raymond)及七十五歲嘅鄉議局主席劉皇發可能例外,事關Raymond同發叔分別各有原因要競逐連任,勢必拉高立法會平均年齡,到二○一六年任期尾嘅時候,發叔更有機會成為年屆八十歲嘅「超高齡」議員。

功能界別「換班」之風盛行,建制派同泛民主派都有「送舊迎新」嘅現象,「四大懶蟲」之一嘅中總代表黃宜弘同金融界李國寶都預計無得留低,體育界霍震霆亦好大機會畀港區人大代表馬逢國取而代之。至於泛民方面,擔任教育界議員多年嘅張文光亦退下火線,由教協會長馮偉華接棒;法律界吳靄儀如無意外亦會放棄連任,由公民黨大律師郭榮鏗頂上。

不過,有現任議員反其道而行繼續博留低,好似現年七十三歲嘅Raymond聲稱,至今仲未搵到合適人選接棒,而且佢又無徒弟,相信好大機會再次競逐連任。佢又自言,本身體魄都keep得好好,平時有做定期驗身,各項指標都好正常,其中檢驗骨質疏鬆時,醫生仲發現佢嘅骨質情況似三十幾歲喎,為自己年紀大嘅弱點諗定解釋。

至於有「新界王」稱號嘅發叔,年紀大嘅程度堪稱「超高齡」,但據聞佢有好冠冕堂皇博留低嘅「護身符」,就係鄉議局主席要做議員,先有政治能量同政府討價還價,所以發叔九月再入局時,會以七十六歲成為最高齡議員,四年後離開立法會時更會破天荒高達八十歲。咁搞法,分分鐘畀人話佢同Raymond係立法會古董都唔出奇喎。

泛民逃兵箍護協票

泛民方面亦有功能界別議員想繼續冧莊,呢個就係衞生服務界李國麟。據聞只要佢繼續取得香港護士協會支持,即使有建制派攔路虎出現亦只係隔靴搔癢。不過話時話,李國麟有幾「泛民」大家心中有數,連任後會否再屢次成為「泛民逃兵」呢?相信呢啲疑問必定成為泛民選民決定係咪支持佢嘅重要因素。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報