中環出更：大劉 肥仔岳飯局訴苦？
近日貪曾及多名富商捲入貪腐案件，案情愈爆愈精彩，涉及人物仲愈來愈多。話口未完，卓妮尋日中午行過灣仔，竟然見到捲入澳門世紀巨貪案嘅華人置業主席劉鑾雄（大劉），同麗新集團主席林建岳（肥仔岳）前後腳到富豪飯堂「福臨門」食飯，歷時最少個多小時先至分別離開。其中大劉同肥仔岳嘅離開時間相距只有五分鐘，唔知係咪約埋撐枱腳互相訴苦呢？
卓妮見大劉抵達福臨門時，見佢頭耷耷全程愁爆，好似心事重重咁款。又好難怪嘅，事關佢捲入澳門前運輸工務司司長歐文龍巨貪案，而且其中五幅土地正係大劉旗下華人置業興建嘅「御海‧南灣」樓盤，該項目投資額高達二百億元，依家話不排除會被澳門政府依法收回，大劉仲唔搞到心都實埋咩！依家約食飯搵人訴苦、解吓悶都唔出奇。
正當大劉入咗福臨門十分鐘後，肥仔岳就現身，但見佢嘟住個嘴行入門口，神情有異，又係滿懷心事咁款。
前後腳現身福臨門
其實除咗大劉喺澳門有投資外，肥仔岳旗下嘅豐德麗亦曾投資澳門路氹城嘅星麗門，惟工程一直停滯不前，直至去年星麗門發展商先將六成權益售予第三者財團，同樣都係好頭痕，因為喺澳門都引起好大回響。其實依家肥仔岳喺鄰近澳門嘅橫琴都有一個發展項目，亦引起各界關注。
大劉與肥仔岳同場出現，莫非真係約埋一齊食飯互相訴苦？如果係真嘅話，咁佢哋就真係稱得上「沙煲兄弟」喇！話時話，大劉喺夏天已經因為澳門巨貪案搞到一身蟻，而且仲有大把手尾跟，睇怕遲啲去到秋天嘅時候，可能會有更多人牽涉在內都未定，隨着愈揭愈多，相信好多嘢會真相大白。
卓妮