做人難，做窮人更難，做香港嘅窮人難上加難！
點解香港嘅窮人特別悽慘嘅呢？露宿者只不過瞓街啫，經常被食環署以洗街為名驅趕都算嘞，警察叔叔居然兇神惡煞唔准露宿者收拾自己嘅個人物品，提款卡呀，身份證呀，一律當垃圾丟棄。喂，窮人都係人，有阿媽生o架，你估香港警察真係國產公安咩，唔好亂咁踐踏人權吖嘛！
講到窮人嘅慘情，社聯最近做過一項調查發現，全港有大約百分之十八嘅市民處於匱乏狀況，而綜援人士之中，超過百分之五十五受訪者生活匱乏，殘疾人士就超過三成。
何謂匱乏呢？社聯喺問卷之中設定三十五項條件清單，包括住屋、醫療、起居生活等等，受訪者負擔唔起其中四項或以上即算匱乏。
調查發現醫療方面嘅匱乏狀況好嚴重，近六成綜援人士不能定期檢查牙齒，超過五成綜援人士急病之時冇辦法睇私家醫生，而有子女嘅綜援人士匱乏比率近八成。於是乎社聯就建議嘞，改善綜援制度，包括調高綜援標準金額以及調整租金津貼，促請新一屆政府正視貧窮問題，改善退休制度並且加強公營醫療服務。
之所以有必要促請新一屆政府正視貧窮問題，冇辦法，現屆政府壽命剩低不足一個月貨仔。更何況以往績而論，曾蔭權政府不但視民望如浮雲，更加視窮人如草芥，促請貪曾正視貧窮問題等於問和尚借梳。如果曾氏政權任內七年肯做正經事，香港窮人早就唔使瞓天橋底啦，亦唔使聽佢發表荒謬絕倫嘅硬膠派偉論「香港不存在無瓦遮頭嘅問題」。
窮人之所以窮無立錐之地，好多時候係官商勾結造成嘅惡果。樓價貴成咁，屋租高到暈，草根階層迫於無奈住劏房，一個唔覺意十萬火急變燒豬。香港嘅地產霸權係點樣形成呢？咪就係前政務司司長許仕仁之流嘅高官，拍住地產商密斟密斟密密斟搞出嚟o架囉。曾蔭權接受奢華款待又係為咗乜呢？枱底交易呢家嘢，亦即係枱底「膠液」，膠液功能係一味靠黐，特首黐飲黐食，富豪黐利黐益。
簡單咁講，窮人生活匱乏，官商良心缺失。由貪曾帶頭腐敗，許仕仁變咗「也許是人、也許不是人」，大官小吏全方位向商賈巨富傾斜，香港嘅貧窮問題變成深層次矛盾。窮人唯一自我安慰嘅係，高官富豪嚴格而言都係窮人，窮得只剩下錢咁解。
所以咯喎，下屆政府真係任重而道遠o架，未來特首梁振英如果唔想步貪曾後塵淪為過街老鼠，唔該唔該，認真諗諗辦法打救窮人。你知啦，窮人一多，社會必亂，揭竿起義往往由窮人帶頭起革命！