「食君之祿，擔君之憂」並不是甚麼大道理，可是，自稱「飲香港水、流香港血」的貪曾，卻是飲香港水竟把「廉潔奉公」的香港清流攪渾！貪到最後一分鐘嘅佢，原本集榮寵於一身，如今卻搞出個過街老鼠，人人喊打嘅局面！
「是人民在養你們啊！」領導人曾發出感性一呼！「是納稅人在養你啊，曾爵士！」食君之祿，擔君之憂——這「君」——是廣大的納稅人啊！曾爵士由一九六七年加入政府，其父其弟均為警務人員，照道理冇理由唔知廉潔奉公嘅公務員守則，如今貪曾竟不避嫌，接受富豪海陸空嘅招待；而且一貪再貪，豪花公帑住總統套房，令人嘩然！
講真，納稅人待貪曾一家真係不薄，有學者幫佢計過數，貪曾「服務」政府三十六年，薪酬福利大大話話至少五千萬元！過去十年擔任政務司司長及特首期間，單是薪金亦逾四千萬元！每天上聖堂嘅貪曾，如果有良知，好應該感恩！可惜佢不但敗壞公務員聲譽，更令特區蒙羞！
貪曾嘅前御廚于燕平，由廚房走到舞台搞棟篤笑《鑊鏟啟示錄》如此寸貪曾：「到目前為止，我覺得佢唔係壞人，亦唔係好人，我尋遍四萬字嘅《康熙字典》，竟搵唔到適合嘅詞來形容佢！」
老朽相信惡有惡報，貪亦會有貪報；貪曾即使沒有被彈劾下台，即使沒有萬千臭蛋慶卸任，要言之，佢都冇可能拍拍屁股，就咁叫港人忘記佢！我肯，十七萬公務員都唔會「包容」啩！