早兩日公務員團體聯署撐新政府架構重組，隨即引發公務員政治中立爭論，其中紀律部隊評議會輪任職方主席文少峰更被批擅自參與聯署。有多個成員團體指未獲知會，亦有獲知會團體即使力陳利害反對，但文少峰仍要聯署。據聞有不滿嘅團體變成「憤怒鳥」，計劃喺今早舉行嘅紀評會會議上要求文少峰交代事件。
據聞文少峰最初以電郵只知會四名紀評會主席團成員嘅意見，其中懲教事務職員協會已回覆認為公務員要保持政治中立，不應聯署，並表明紀評會一向嘅做法係不獲共識便不能通過，但文少峰竟然話四比一，決定聯署。
本報尋晚向本身係消防主任協會主席嘅文少峰查詢，佢話正在開會不便回應。
對聯署不表反對嘅入境事務主任協會副主席倪錫水認為，若有助公務員服務巿民運作暢順都會支持，但當時未想到會引發「政治漣漪效應」，若想到就唔會同意聯署。「簽咗先知」嘅消防處救護員會主席陳仕祺就話：「認識政治不應參與政治，作為公務員希望緊守中立。」