政情：周日萬人遊行 便衣警收風
廿多個團體將於周日發起萬人遊行，尋找內地民運人士李旺陽死亡真相，尋日就喺立法會開記招交代詳情。李旺陽雙腳着地自縊身亡已經夠晒離奇，但更離奇嘅係，尋日記招有個心口掛住大大個香港警察徽章嘅仁兄出現，佢一開始喺門口裝裝吓，去到記招中段仲企埋入房添，臥底都唔係咁滲透吓話？
不過，咁多位民間團體嘅代表見到呢位仁兄就從容自若，仲叫佢馬Sir前，馬sir後。原來馬Sir係警民關係科嘅手足，事先已得到團體同意嚟聽下記招，但就唔知點解要搞到咁鬼祟。馬Sir話，佢知道團體周日有遊行，但又未申請警方嘅不反對通知書，所以就過嚟𥄫𥄫喎！
馬Sir仲即場畀咗個溫馨提示主辦團體，原來星期日遮打花園已經畀其他團體預訂舉辦活動，所以遊行要改集合地點。見馬Sir咁順得人，咁星期日可唔可以畀市民喺中聯辦正門外集會呀？馬Sir即刻耍手擰頭話，唔好逼佢答啲應該由高層答嘅問題喎！