政情：李慧琼平底鞋襯波衫
歐洲國家盃即將開鑼，民建聯副主席蔣麗芸（Ann）同李慧琼（Starry）尋日就齊齊換上波衫宣傳反賭波訊息，本來佢哋提出大路嘅建議都好穩陣，但事後被問到鍾意邊隊國家隊或球隊時，阿Ann諗咗一陣先講得出鍾意法國隊，似乎唔多在行。有在場人士笑言，或者一切「錯有錯着」，可以加強宣傳反賭波嘅說服力喎！
阿Ann同Starry尋日孖公仔喺深水埗硬地足球場舉行記者會，公布「愛踢波，唔賭波」嘅問卷調查，佢哋為咗加強說服力，分別穿上法國同西班牙球衣出席。原本成個記者會都搞得似模似樣，又有前香港足球先生山度士撐場，但當影大合照時，有人就發現Starry有波衫但無波鞋，反而着咗對OL嘅平底鞋現身球場，當堂露晒底。
Starry解釋，着平底鞋出現同之後要去立法會開會有關，又話着西班牙波衫係因為自己鍾意紅色喎。