政情：周一嶽爆高永文「大鑊」
好多政界名人都會用「自嘲」呢招嚟幽自己一默，但用得唔啱時候，就變成獻醜。好似食物及衞生局局長周一嶽（周一鑊）明知自己無得留任新政府，已經唔係好光彩，但佢偏偏尋晚喺一個晚宴上攞出嚟講，唔知醜之餘，仲酸味十足，周一鑊仲當場爆料暗示在場嘅骨科名醫高永文係下屆局長。
公共醫療醫生協會及政府醫生協會尋晚舉行廿二周年聯合晚宴，好多醫生同高官都畀面出席，其中周一鑊就喺致辭時話唔想講太多喇，想留番重要嘢畀下任局長講喎，仲爆料話現場有位無打呔嘅醫生，就係下屆局長。現場人士即刻望住大熱人選高永文，原來佢真係無打呔喎，搞到高永文好尷尬。
既然周一鑊主動爆大鑊，預告下屆局長人選，在場班醫生好似蔡堅、謝鴻興等人都老實唔客氣，完場後只同高永文握晒手兼「咬耳仔」，非常老友鬼鬼，反而周一鑊就無咩人理佢，自己孤零零一個喺場邊發霉，無辦法啦，連佢自己都預早交定個發言權畀高永文，人哋仲唔當你透明咩！