政情：新政總滿座 副司冇碇踎
斥資逾五十億元興建嘅添馬艦新政府總部入伙差唔多一年，除咗爆出豆腐渣工程甩甩漏漏外，原來設計新總部時亦無預留足夠「走盞」空間，導致未能完全安置新政府架構重組後嘅部門，到依家都未知點收科。據聞現屆政府諗咗條屎橋，打算安排新增嘅副政務司司長及副財政司司長暫時喺中環舊政府總部辦公，此舉變相將新政府斬開辦公，夕陽政府搞交接搞到唔湯唔水，真係好離譜。
我哋亦就此事問過行政署，該署死撐話政府喺新總部工程項目嘅設計階段已經嚴格審批各政策局呈交嘅面積要求，強調佢哋只係容許各政策局負責制訂政策嘅官員同職員搬入新總部，但結果都係唔夠空間安置新政府嘅五司十四局部門。搞出呢個交接大頭佛，都係罪歸於貪曾無遠見，喺當初設計新總部時無預留足夠位置，反觀立法會都有預留空間應付將來議席增加啦！
對於副政務司司長及副財政司司長要安排喺舊政府總部辦公，據聞候任辦公室都感到不滿，事關無理由要新政府部門分開喺兩個地方辦公。我哋就此問過候任辦，佢哋話新政府辦公地方現正安排緊，又話兩位副司長將設有私人政務助理、新聞秘書及其他辦公室職員。簡單啲講即係兩個副司長嘅支援人員都唔係少數目，如果要夾硬搬入新總部，就要將部分唔等使嘅部門遷出。
陳茂波唔介意坐冷巷
不過，盛傳好大機會擔任下屆副財政司司長嘅現任會計界立法會代表陳茂波（Paul），就對新政府總部逼爆晒冇有怕，話真係無位坐嘅話可以「坐冷巷」喎。阿Paul又話，就算要喺舊政府總部做嘢都係一個可行辦法，又話新舊政府總部之間嘅距離唔算太遠，往來都算幾方便喎。至於將來嘅副政務司司長係咪鍾意喺舊政府總部辦公，咁就要遲啲先至問到佢喇。
阿Paul就話大方無所謂啫，但同一地點辦公係關乎新政府班子嘅完整性及辦事效率，試問新政府又點會收貨呢！假如當初叫唔畀貪曾搬去新總部，要佢喺舊總部辦公得唔得吖？所以話呢，做事要過得自己過得人。