中環出更：龐愛蘭「童樂日」 妙韻療傷
盛傳有意出戰九月立法會選舉嘅沙田區議員龐愛蘭（Scarlett），近日動作多多，卓妮有日就喺銅鑼灣富豪酒店見佢飲茶歎點心，同枱仲有「二胡王子」王憓（Ray）。原來Scarlett正準備喺沙田「麥當勞叔叔之家」舉辦一場溫馨探訪，諗緊搵資深鋼琴家羅乃新等音樂人齊為病童送上歡樂。擅長拉二胡嘅阿Ray一聽到呢個善舉，即時拍手呼應。
二胡王子獻技
位於威爾斯親王醫院附近嘅「麥當勞叔叔之家」院舍，係建築、測量及都市規劃界議員劉秀成所設計，Scarlett話，有次劉秀成帶佢去參觀，令佢更加了解呢個同快餐店無關嘅慈善機構。中心成立目的係為患有癌症等重病嘅兒童及家人提供暫時居所，以免喺病童治療期間舟車勞頓，所以佢打算動員一班名人朋友，搞一場有嘢食、有音樂聽嘅溫馨之夜，令病童及家人暫忘痛楚。咁啱阿Ray同羅乃新係多年老友，到時一齊鬥技，相信一定好精彩。