中環出更:楊華勇接掌菁英努力「造人」

匯聚城中青年才俊嘅香港菁英會,日前舉行周年會員大會,順利選出年初小登科嘅福建社團僑領楊孫西兒子楊華勇(Johnny),於七月一日起接下主席洪為民(Witman)嘅火棒,成為菁英會第四任主席。前主席施榮忻、白富鴻及一眾兄弟姊妹都嚟見證開心時刻。

Johnny婚後個人開心好多,佢自認以前唔黐家,雖然依家都係同父母一齊住,但有嬌妻喺屋企等佢,「家」嘅感覺自然唔同晒喇!講起「造人」大計,Johnny笑言努力中,希望生兩至四個喎!

洪為民轉移公職重心

卸下主席重任嘅Witman就話,日後將慢慢淡出青年組織,將公職重心轉移到其他方面。目前佢除咗已接任互聯網專業協會會長外,亦係交通安全會主席,仲會喺嚟緊七月書展上推出新書《公義為民》,收錄佢過去四年關於政策、科技、互聯網、青年及教育等方面嘅文章,為社會進步出分力。

當日出席嘅菁英們逼到現場水洩不通,卓妮發現副主席莊家彬帶埋細佬莊家豐(Edwin)出席,佢哋個樣真係成個餅印一樣。

Edwin係最近一期畢業嘅國情班同學,同期嘅仲有「糖薑大王」余達之孫女余皓媛(Grace)。Grace勁讚Edwin喺北京學習期間,對每一位同學仔都悉心照顧,十分細心。

風趣健談嘅Edwin啱啱返莊士集團幫手大約一年,主力負責集團喺廈門及九龍嘅酒店新項目,講起理想中嘅酒店滔滔不絕。廿七歲嘅後生仔,一腔尋夢熱血,抵畀一百個like。

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報