貪曾「詐喊」不成，似哭非哭出來道歉，佢平時貪威識食，歎慣私人飛機、豪華遊艇，你叫佢一時要「甘」盡「苦」來，你估貪曾啲眼淚，係𡃁模啲事業線咁神奇：一谷就有咩！
其實，谷淚不成更招惹全城怒吼，前公務員事務局局長王永平就講得啱，當年梁錦松涉嫌偷步買車慳咗十九萬元，其後把雙倍差額，共三十八萬元捐予公益金謝罪，貪曾想顯示道歉誠意及問責精神，就好應該將享受過的優惠攞番出嚟，效法梁錦松「雙倍回水」，其他的法律責任，等佢下台後再慢慢算帳。
貪曾食相難睇，舔到最後一秒，老朽話唔知點安慰佢，乃係肺腑之言；做特首做到衰過隻坑渠老鼠，確係獻世！之不過咁，人稱「傻強」嘅財經事務及庫務局局長嘅陳家強，竟然仲未長大，依然好天真好傻咁話「好欣賞曾蔭權嘅態度」！阿哥，你係𡃁模，樣靚身材勁，十六歲時冇腦做錯事，老朽見你梨花帶雨楚楚可憐，肯定會想攬實你安慰吓：「做人要向前看，過去如煙，往後大把世界！」之不過，男人老狗仲咁傻咁天真，又點攬得落呢？
貪曾手下多傻將？香港今日搞到亂七八糟，醫療、教育、居住、安老、扶貧……無一瓣掂，究其因，無非啲高官多不食人間煙火，沒有親身經歷艱難，試問又怎懂得去安慰別人！CY話要「一本簿、一支筆、一張櫈」多落區聽民意，亦要求眾高官都咁做，深入社群，老朽欣賞佢嘅態度！