中環出更：蒙德揚不滿兩大科技發明
信興集團副主席蒙德揚愛工作，亦愛旅行，佢不時喺旅行時都繼續工作。尋日喺沙田馬場見到蒙德揚，佢話佢嚮往優哉游哉嘅生活，只要公司基礎穩固，營運上軌道，咁就鍾意去邊度玩都無問題。蒙德揚酷愛喺外地跑公路賽，佢講笑話最不滿傳真機同互聯網呢兩大科技發明。佢話就係因為有傳真機同互聯網，令佢去到天涯海角都難以擺脫俗務纏繞，工作時間大大延長，但係呢兩件法寶無疑又令到工作更有效率，真係令人又愛又恨。
鄧鉅明約林建康坐郵輪
太子珠寶鐘錶主席鄧鉅明都話要去旅行唔使等退休，佢已經有晒計劃，暑假約好愛沙尼亞共和國駐港名譽領事林建康一齊去歐洲坐郵輪。
佢話長江後浪推前浪，一定要畀機會後輩發展，公司至可以經得起激烈嘅競爭。不過鄧鉅明話佢太太好欣賞佢喺公司運籌帷幄，指揮若定嘅架勢，所以唔鍾意佢講退休喎。