中環出更：仁濟海皇「糉」善因
端午節食糉，唔單止應節，仲可以做善事。尋日海皇粥店聯同仁濟醫院合辦親子慈善糉子義賣活動，懲教署署長單日堅夫婦、海皇老闆蕭楚基（Caecage）、仁濟董事局主席鄭承隆（Edwin）同一班兄弟姊妹齊撐場。佢哋仲即場比試包糉，原來大家都係初哥，不過絕對唔失禮，仲包得似模似樣添。
Caecage同Edwin相識多年，原來係做善事結緣，加上同係潮州人，「家己冷」特別同聲同氣。講起食糉，佢哋不約而同話最愛潮州糉，餡料包括蝦米、栗子、五花腩，仲有豬網油包住啲花生同蓮蓉，鹹甜嘅味覺交錯，特別滋味。
蕭楚基改孫仔名抓爆頭
Caecage上月榮升爺爺，開心到飛起。佢話孫仔取名浩明，初時諗到頭都痕，事關「蕭」同「燒」同音，改壞名就唔好啦！今次Caecage捐出善款及贊助全場糉子，為仁濟「明日更生慈善基金」籌款，幫在囚人士嘅未成年子女解決生活困難。佢仲話，遲啲乖孫擺百日宴，全部收到嘅禮金都會捐晒畀基金，幫乖孫做善事咁話喎。
仁濟總理吳國榮（Michael）就話自己好專一，只鍾情最傳統嘅鹹肉糉配辣椒油。佢笑稱自己感情上都好專一，皆因剛剛同老婆慶祝咗二十五周年結婚紀念。當晚撐枱腳之餘，Michael仲送咗隻戒指氹老婆，估唔到老婆又咁啱揀咗隻戒指回禮，兩夫婦真係心靈相通。
卓妮