政情：金刀梁夫婦不肯言退
醫療科技日趨完善，現代人嘅壽命普遍延長，雖屆松柏之年仍舊精力充沛，行政會議成員梁智鴻就係一例。雖然有傳佢港大校董會主席嘅公職將被取代，但係佢話對於服務社會嘅熱誠唔會減退。
梁智鴻話港大校董會主席嘅任期今年十一月屆滿，但係續任與否，佢仲未收到通知。佢又話縱使退落嚟，仍然會繼續做泌尿科醫生，即係話金刀梁唔會有封刀嘅一日喇。梁智鴻嘅太太、前瑪麗醫院放射科部門主管馮令儀亦剛於兩個月前喺服務咗四十年嘅瑪麗醫院榮休，兩公婆將步伐一致，繼續參與社會公職。
梁智鴻嘅胞弟、公開大學校長梁智仁就認為年紀大唔代表能力下降，有啲大學部門係好需要有經驗嘅人才。佢話以大學校長為例，除咗學術上要有認受性，仲要有豐富人生閱歷同廣闊嘅社會網絡，全部都要時間累積與沉澱，所以擔任大學校長嘅人，年紀都有番咁上下喎。