政情：發叔夏佳理睇樓市走極端
劉皇發同夏佳理都係行政會議成員，但佢哋對樓市嘅睇法好唔同。「新界王」劉皇發頻頻喺元朗區賣地套現，但召集人夏佳理就密密喺南區掃貨，究竟邊個睇後市準啲，過多排就揭曉。
發叔最近喺五月五日通知行會秘書處，話自己同老婆共同持有一個位於元朗區嘅住宅出租物業已經賣出。除咗賣樓，連地都賣埋，佢分別賣出四幅位於元朗區嘅土地，另外兩幅喺屯門區嘅地亦賣咗。六塊地入面有四塊收租，唔通佢睇樓市跌？發叔喺屯門元朗有唔少地，不過佢成日同人好謙咁話，啲地全部細細幅，冇乜用。
有人做淡友，亦有人做好友。行會召集人夏佳理本身鍾情磚頭，手上持有全部係住宅。但最近佢殺入商廈，五月十五日申報自己喺南區掃咗兩個寫字樓單位，全部用嚟投資，仲要分別用兩間公司名義持有。總之一個喺新界北散貨，一個就睇好南區商廈。