政情：劉靳麗娟積極操fit自己
新任婦女事務委員會主席劉靳麗娟身兼名校拔萃女書院校長，要照顧全校千幾個學生，工作已經好忙，做埋婦委會主席喺時間上更加分身乏術，不過佢有一套堅持，就係首要搞好健康。
劉太話自己幾忙都好，每晚都會游水keep fit，一游就二、三十個塘，喺學校更加出咗名行路極快，有學生同佢講：「Mrs Lau點解你行路有陣風嘅？」佢話巡堂唔會搭𨋢，行路當做運動，運動好身體好自然就精力充沛，工作都充滿活力咁話。既然學校支持佢做婦委會主席，佢一有機會就同學生分享做婦委會嘅工作經驗，等學生清楚佢喺出面做緊乜，並唔係幾個闊太玩玩下。
劉太七二年喺拔萃畢業，九○年由加拿大返港去拔萃教書，佢講番當年一件好有趣嘅事，就係佢第一日返學就要影班相，有學生就要求劉太要着住校服一齊影，咁啱佢喺拔萃讀小三嘅女放學，兩母女就齊齊着校服影合照，認真經典。