政情：工聯醫療車 加碼吸票

象哥拉線籌款 今年再添食

本身係工聯會會長林淑儀老公嘅民建聯進出口界立法會議員黃定光（象哥）去年幫手拉線，成功爭取到善長捐錢為工聯會購置第一部醫療車，據講反應相當正面，有見醫療車有成效，工聯會今年再添食，購置第二部醫療車服務市民，捐出二百萬元買車嘅仍然係去年嘅善長，而拉線嘅當然都係象哥。

工聯會嘅工人俱樂部診療所好多區都有，反而靠一部醫療車可以服務幾多市民，真係好大疑問，不如就當佢係一個流動廣告牌好過。柴灣同小西灣一帶一直係鍾樹根地頭，工聯會今次殺入呢區，擺明就係要同民建聯爭一日之長短。不過話時話，工聯會呢部醫療車係由象哥促成嘅，唔知民建聯班領導層會唔會唔開心呢？

郭偉強大熱任勞工界議員

除咗醫療車外，工聯會港島區班樁腳對王國興嘅選情都有舉足輕重影響。我哋之前講過，東區區議員郭偉強（Aron)九月極有機會代表工聯會出任勞工界立法會議員；外表四四正正嘅Aron尋日出席醫療車啟用儀式時就好謙虛咁話，自己有做立法會議員嘅興趣，不過工聯會對勞工界議席未有最終定案，佢會尊重理事會最終安排喎。

Aron又話，自己一向專注地區工作，如果真係做到立法會議員的話，好多全港性議題都要惡補，一定要向工會所有前輩請教咁話。不過佢強調，自己對勞工政策同議題有一定認識，因為十幾年前已開始幫工聯會榮譽會長陳婉嫻做助理，學到唔少處理勞資糾紛嘅技巧，亦對勞工議題有一定理解。有咁強嘅樁腳，工聯會選情應該都幾審慎樂觀。