晾曬損市容路署懶執法
踏入初夏，街頭陸續湧現非法晾曬，路政署被指有法不執！黃太指近日發現時有人於沙田秦石邨石瑩樓對出行人隧道欄杆晾曬衣物。「上年呢個時候係咁，今年又係咁，索性整個合法晾曬場畀啲街坊啦！」黃太指去年經本報報道後，情況稍有改善，惟如今故態復萌，不滿路政署「唔踢唔郁」。
路政署發言人表示，政府已在上述地點張貼告示，勸喻市民勿在欄杆晾曬衣物，但仍有市民罔顧公德，在政府設施上晾曬衣物，當局會盡快與相關部門安排清理行動。
「如果邨民有咁嘅需要，部門應考慮搵個合適地方，喺一個特定時間畀佢哋曬衫！」沙田區議員陳諾恒直指公屋住戶多因家居狹窄而未能在家晾曬衣物，當中尤以大型被鋪為甚，認為當局亦應予以體諒。