立法會由上月初開始日以繼夜，夜以繼日表決出缺機制草案，終於喺尋日否決晒一千三百幾項修訂，之後輪到表決討論多年嘅競爭條例草案，但三十多名建制派疑似畀「拉布」戰拉到散晒，有人以攰到爆為由決定今日唔開會，擺明唔畀面負責競爭法嘅商務及經濟發展局局長蘇錦樑（Greg）。
討論多年嘅競爭條例草案，原定打算喺今日開始二讀，據聞Greg蘇因為憂慮無足夠支持草案嘅議員在席，早前出口術游說議員務必要出席為草案保駕護航。不過，Greg蘇呢個如意算盤暫時應該打唔響，據聞建制派私底下擔心人數不足會流會，所以索性打算今日唔再續會。
有知情人士話，呢個只係冠冕堂皇嘅藉口，實際上要湊夠人數開會並唔困難，只係佢哋畀人「拉布」拉到身心俱疲，於是打退堂鼓停一停、抖一抖啫，完全當之前Greg蘇嘅呼籲無到，Greg蘇做局長做到無人畀面認真失威。