政情：蘇菲梁當鍾國斌冇到
數吓手指，紡織及製衣界立法會議員梁劉柔芬（蘇菲梁）由九七年臨時立法會起開始做議員，一做就十五年，坊間一時話蘇菲梁對嚟緊立法會選舉意興闌珊，一時又話佢會競逐連任。蘇菲梁終於開估，聲言唔會再參選，理由係已經搵到新人接班，呢位新人就係聯泰控股行政總裁陳亨利。
蘇菲梁話會全力支持陳亨利參選，又話會將佢啲支持票全數過戶。不過，當記者問蘇菲梁驚唔驚退位會益咗對手自由黨嘅鍾國斌（Felix）時，蘇菲梁就即刻好大反應咁講咗一句：「我從來都無當過佢係對手！」蘇菲梁嘅眼神當時極之堅定，認真夠氣勢。
另一邊廂，Felix亦信心十足，話有信心搶到大部分中小企票源，仲可撬走原本支持蘇菲梁嘅百幾票。Felix仲話，如果再加埋○八年支持佢嘅七百幾票，兩人嘅實力可以話係不相伯仲。Felix○八年選舉僅以五百幾票之差輸畀蘇菲梁，如果今屆換上新人陳亨利，自由黨要突圍都唔係無可能。