政情：方文雄促貪曾交代道歉
煲呔曾之前信誓旦旦話奮鬥至任期嘅最後一分一秒，但前日公布嘅審計報告踢爆佢其實係貪到最後一分一秒，全城要求貪曾回水同辭職嘅聲音此起彼落，連親中團體嘅中華總商會副會長方文雄都疑似睇唔過眼，要求貪曾向公眾道歉外，仲要清楚交代外訪嘅事。
方文雄尋日同兒子Vincent喺香港會所食飯，問佢點睇貪曾連串貪得無厭事件，佢就話貪曾一定要企出來解釋清楚成件事，並且要向市民道歉，又話煲呔曾作為特區之首，外訪時無疑有保安安排，但始終係用緊公帑，所以應該好好同大家交代喎，仲建議日後可以參考外國其他同級數人士嘅外訪安排。
此外，政圈盛傳「四大懶蟲」之一嘅中總代表黃宜弘被勸退，其中一個可能接班人正係方文雄。不過，方文雄尋日表明唔會參選，又話一切交畀中總會長蔡冠深處理喎。