公園農藥攻鼻市民難頂
居於粉嶺的徐伯經常到附近公園散步，早前前往百福田心遊樂場時，甫踏入公園已嗅到陣陣刺鼻異味，「睇到個告示先知噴咗農藥，啲味好攻鼻，呢度成日有小朋友嚟玩，都唔知會唔會對佢哋身體有害？」
康樂及文化事務署發言人表示，由於上述公園出現蚊蟲孳生，並有植物受害蟲侵襲，職員遂張貼告示安排遊人遠離施藥範圍，並分別噴灑滅蚊劑及施放農藥。發言人強調，一般不會在烈日、下雨及大風時進行上述行動，而使用的農藥亦由漁農自然護理署註冊，有合格包裝和標籤的除害劑，所有除害劑的劑型及濃度水平均有施加限制。
「話就話合乎標準啫，但真係好臭好難頂，可唔可以換隻淡味啲？」徐伯建議當局可考慮選用氣味較淡的殺蟲劑，從而減少對附近環境造成影響。