今年七月一號回歸紀念日，會有幾多人開香檳慶祝係冇乜人關心嘅，反而有幾多人上街示威嘅問題就吸引力大得多。你知啦，○三年七一遊行出現五十萬人壯觀場面，卒之搞到董建華腳痛落台，可想而知七一遊行人數絕對係非常有參考價值嘅政治指標。
稍稍唔同嘅係，今年七一遊行唔會有人再喪叫「曾蔭權落台」或者「煲呔曾滾蛋」，事關呢一個晚節不保嘅貪曾，到時已經係一個「新進過氣特首」，唔使趕都蛋已滾。
的而且確係晚節不保㗎，根據中大亞太研究所民意調查顯示，貪曾表現評分又創歷史新低，只有四十三點一分，較上月下跌一分。原因好簡單，東方報業集團連環踢爆特區阿一嘅貪腐行為吖嘛，曾蔭權變咗一隻千夫所指嘅過街老鼠。
七一遊行例牌由民間人權陣線發起，除咗一貫爭取民主自由嘅訴求之外，今年主題係針對官商勾結。至於遊行路線咯喎，終點當然係淪為國際笑話嘅添馬艦新政府總部啦，如果當日再出現「樓梯變瀑布」嘅奇景就好嘞，示威者大飽眼福。
香港官商勾結點解愈來愈嚴重嘅呢？其中一個原因相信同中國化有關，近朱者赤，近墨者黑。中國貪官多如天上繁星，邊個行近少少都會受到污染，香港警方都逐漸化身「港產公安」啦，官商勾結自然變本加厲。
其次咯喎，咪又係曾蔭權教壞細路囉，呢家嘢叫做「近曾者貪」。喂，煲呔作為最高嘅官，有時勾結富商玩豪華遊艇，有時勾結富商搭私人飛機，有時出席江湖派對，勾結來勾結去，其他挑通眼眉嘅達官貴人自然心領神會，一個二個有樣學樣沆瀣一氣。
所以話啫，即使貪曾依時依候夠鐘落台，下屆政府都唔可以就咁算數，一定要撥亂反正，最好繩之於法。計功夫茶話齋，傍實富商黐飲黐食必然涉及枱底交易，如果未來特首梁振英能夠肅清「曾商勾結」，大快人心之下民望冇可能唔升。
踢走官商勾結其中一個上佳辦法係殺一儆百，情況好比當年廉署打老虎捉葛柏，成個警隊當堂嚇到窒一窒，縮番嗰一隻收黑錢嘅邋遢手。即係咁，若然你勾結我、我勾結你嘅貪曾集團受到法律制裁，官商勾結嘅問題應該得以紓緩。
咦，話時話喎，七一遊行雖然冇必要喪叫「曾蔭權落台」，其實可以改一改口號，不妨高呼「煲呔曾受靶」。冇錯係受靶，經過法律制裁就要受靶㗎啦，出得嚟行，預咗要還。
回歸十五年，經濟民生走向死胡同，財團推高樓價，政府助紂為虐。如果唔踢走官商勾結，蝸居一族唔使指望有個安樂窩！