「文化」一詞忽然成為紅不讓，香江呢輪除了樓市喺「冰與火」的煎熬，鬍鬚曾冰火重生，有得留低只好繼續狂發夢囈，文化亦多喧囂！這拜新政府要設立「文化局」之賜。
其實，對「文化」不需陳義過高，啲評論一時話做文化局局長要有專業、要有背景、要有對中西文化嘅視野……講真喇，文化係一種生活方式，各地都唔同。舉個例，內地湖南省紀委預防腐敗室副主任陸群指出：取消公務接待，在目前這種文化氛圍下很不現實。打個比方，上級來了個領導，視察工作，過去毫無疑問，由地方好好招待。假如改革了，取消公務接待，他們來視察，自己掏腰包，我可能會很不好意思，上級領導也可能會覺得受到冷落。
這位陸群真係講得好，文化就係一種生活方式，根深柢固，一時不容易改過來！所以話無論邊個做文化局局長，即使有天大本領，也無可能令香港人立刻有文化起來，個個熱愛文學、音樂、藝術，人人不是迷戲曲，就係愛歌劇，將多過超級市場嘅馬會投注處變晒書店、圖書館，你估港男就會愛朗誦新詩而不愛o靚模文化咩？
香港有自己一套文化，一個文化局局長可以推動乜呢？加上吾人所處嘅多元時代，香港文化就係馬照跑、股照炒、舞照跳！當然加埋樓照炒！所以話，鄧小平了不起，就係因為佢深明文化係一種生活方式，「一國兩制」幾偉大構思都好，講到尾亦不過尊重港人嘅港式生活文化而已！