政情：小肥張聞副司長黑面

升官原本係高興事，但小肥張尋日出席大學生暑期內地實習計劃出發禮後，一被問到係咪做副司長時，竟然立即黑面，耍晒手叫大家唔好問。

肥亨無興趣返官場

話說小肥張就標準工時及青年就業問題滔滔不絕咁講咗十分鐘，但當記者問佢係咪會離開勞福局做副政務司司長，以及同林鄭合作有無問題時，一向態度親切嘅佢，面部表情頓時由笑面迎人變成黑面，又打手勢示意記者唔好再問落去，搞到在場記者都嚇咗一跳，唔知係咪問中咗小肥張嘅心事呢？

同場仲有前商務及經濟發展局局長馬時亨，佢話家陣擔任幾間上市公司嘅董事，得閒仲會做吓義工，同去學校搵學生傾吓偈，日子過得不知幾充實，所以重申絕無興趣重返官場，又話暫時無人邀請佢加入行政會議喎。