政情：激進泛民 港島執死雞
九月立法會選舉區區都係大混戰格局，好似本身係泛民主派橋頭堡嘅港島區，現時手執兩席嘅公民黨（公文袋），好大機會只剩低陳淑莊出戰，另外一席嘅票源好大機會流畀其他泛民黨派，更可能變成激進派嘅囊中物。有泛民中人分析，暫時只有社民連副主席吳文遠及前黨友醫生勞永樂最有機會搶到呢啲票，當中特別以勞醫生當選嘅呼聲最高。
○八年公文袋取得八萬多票，但經過港珠澳大橋同外傭官司事件後，睇怕嚟緊九月選舉跌票在所難免，加上該黨司馬文未知能否趕得切入籍，所以隨時得番陳淑莊孤軍作戰，估計最多只能取四萬幾票，因而令到唔少有志港島直選嘅泛民人士，都對該黨餘下四萬票虎視眈眈。不過，呢四萬票未必益到白鴿黨，皆因佢哋經過政改方案一役，好難再吸到公文袋啲票源。
咁四萬票會流去邊呢？最終可能流向激進派都未定，但觀乎現時港島區形勢，無一人係屬於激進勢力，所以激進派大有市場。其中一位打算落港島區插旗嘅激進派就係社民連吳文遠，雖然佢老兄係空降港島區，無咩選舉經驗，但如果能繼承黨友「阿牛」曾健成○八年取得嘅一萬票，再加上搶到公文袋一萬幾千票，入立法會都唔係無機會。
變相分薄 兩敗俱傷
不過，要數最有機會食胡嘅，好可能係勞永樂。勞永樂○八年選舉已經退出社民連，但當時都有兩萬幾票，如果佢再次參選，只要喺泛民身上吸幾千票就可當選。勞醫生話，如果佢參選，一定會打正獨立旗幟，強調話呢種真正嘅獨立人士，喺港島有一定市場喎。佢又話，其知名度唔會比○八年低，仲話咁講係有實質客觀數字支持喎，唔通佢靜雞雞做民調？
話時話，兩個激進派代表齊齊出戰，變相會分薄票源，好似○八年阿牛同勞永樂夾埋有成三萬幾票，但可惜兩人唔係同一陣營，唔同名單參選咪搞到兩頭唔到岸輸晒囉！