中環出更：吳嘉汶出嫁 戴自家婚戒
龍年閏月嫁娶喜慶特別多，香港青聯嘅靚女叻仔亦喜事連連，除咗全城矚目嘅霍家長孫霍啟剛將於稍後迎娶跳水公主郭晶晶外，青聯賢慧社副秘書長兼Bee's Diamonds第三代後人吳嘉汶（Rendy），亦將於九月披嫁衣裳，與初戀醫生男友Alan結束十年愛情長跑。
與男友設計紀念鑽飾
Rendy現為Bee's Diamonds企業市場總監，自細喺鑽石世家培育下，品味自成一格，對於陳舊嘅古董美態更加着迷。雖然男友學醫，但為咗親近女友，特登修讀GIA鑽石鑑證短期課程，佢哋最近更聯手為公司設計「Alren」古董系列鑽飾，名稱取自兩人英文名，作為結婚紀念，認真溫馨。
至於定情婚戒，Rendy亦不假手於人，自行設計兼選用至愛嘅藍寶石鑲製，絕對係獨一無二。好姊妹喜逢人生大事，賢慧社主席羅詠詩（Anthea）及前主席彭芷君（Gigi）都忙埋一份，Anthea介紹婚紗設計師畀Rendy，而Gigi就推介婚宴場地，有咁多人錫住，唔怪得準新娘講起喜事笑到甜絲絲喇。
卓妮