提起「野戰」，有人可能會面紅耳熱，其實，功夫茶今日所講嘅野戰，係指野戰遊戲，即係War Game咁解，大家千祈唔好誤會吖。呢種遊戲愈來愈受歡迎㗎，每逢周末假日，發燒友就聯群結隊大戰一番，子彈橫飛，砰砰嘭嘭，緊張刺激兼而有之。
不過咁，野戰還野戰，如果連蝴蝶保育地亦變成戰場，咁就唔係緊張刺激，而係破壞生態喇。呢，大埔鳳園係眾所周知嘅蝴蝶棲息地，好多珍貴品種都係靠呢個「家」先至可以存活，極具保育價值。而鳳園鄰近嘅保育地沙螺洞，更加有「蜻蜓天堂」美譽添。一個係蝴蝶保育地，一個係蜻蜓天堂，唔使講環境梗係寧靜優美㗎喇，可能正因為咁，鳳園竟然成為新興野戰場地，一到周末假日就「讓子彈飛」，莫講話蝴蝶及蜻蜓不得安寧，連行山人士亦隨時被流彈打中！
嗱，本報記者日前追蹤一組鳳園野戰團嘅活動，佢哋將毗鄰沙螺洞嘅鳳園遊樂場山坡闢成戰場，貪嗰度地勢平坦，樹木林立，可以作天然掩護，增加遊戲刺激性咁話。結果呢場野戰一打就係三粒鐘，發燒友固然盡興而歸，但戰場就慘不忍睹咯，到處彈殼，遍地垃圾，植物被踐踏，有啲樹木更被塑膠BB彈打到遍體鱗傷。正如鳳園保育區項目主任話齋，簡直係生態災難。
有行山人士話，以前試過畀流彈射中，曾向漁護署投訴，點知完全冇下文。而漁護署就話喎，上述部分地段屬郊野公園範圍，禁止任何人士攜帶氣槍及火器進入，違例者可被罰款及監禁。講就係咁講，但過去三年居然係零檢控，擺明有法不依，執法不力喇！
本來呢，野戰遊戲係一項健康嘅娛樂活動，放假玩吓點都好過成日對住部電腦或手機，所以咪愈來愈受歡迎咯。弊在本港缺乏免費野戰場地，而收費場地又未必人人負擔得起，好多發燒友焗住周圍搵戰場，結果連郊野公園及保育區都唔放過，搞到蝴蝶及蜻蜓隨時失去家園。唉，發燒友子彈亂飛，破壞生態，固然離晒大譜，而當局袖手旁觀，闊佬懶理，又該當何罪吖？高官口口聲聲重視保育，點知到頭嚟又係大隻講。
話時話，新界鄉郊有好多廢棄官地，擺喺度養草養蚊，有啲仲畀人用嚟堆填垃圾添，與其係咁，點解當局唔好好規劃，增加野戰場地，為市民提供多啲休閒地方，咁咪唔使搞到郊野公園淪為戰場囉。無論點都好，希望野戰發燒友能夠自律，唔好再騷擾蝴蝶及蜻蜓喇！