新政府架構重組面對不少障礙，七月一日五司十四局能否齊齊整整見傳媒，至今仍存一個大大的問號。一個「文化局局長」掀起無窮爭拗沒甚麼大不了，之不過，江湖傳聞周一鑊有可能翻閹，調任勞工及福利局局長，其震撼比之「許曉暉先生」出任文化局局長，恐怕有過之而無不及！
「叮走周一鑊，全民皆快樂」，若然叮佢唔走，搞唔掂食衞醫療，轉去搞勞工福利，即係「留低周一鑊，勞福一鑊熟」！天啊！選賢與能，用人唯才，是多數市民對新政府嘅冀盼，初中生讀過諸葛亮《出師表》嘅都知：「親賢臣，遠小人，此先漢所以興隆也；親小人，遠賢臣，此後漢所以傾頹也。」新政府已留下一個史上最廢財爺，再加多個每周一鑊，老朽深恐「北風捲地百草折，胡天八月即飛雪」，開局唔多利索，日後的步伐就難行也。
老朽想問CY，若然佢發現自己飲緊嘅湯跌咗隻烏蠅，佢會倒咗碗湯，唔飲！或者撈起隻烏蠅，笑住話：「一隻咁大把，冇嘢。」繼續飲！當然，一隻烏蠅即使吞落肚，未必有事，不過，飲嘅人唔覺惡心，睇到佢飲嘅人，內心難免起疙瘩，甚至夜發噩夢！
觀察社會現象，外國有好多「定律」，一條叫「彼得定律」話：在一個機構裏，每個僱員都會升到他無法勝任的職位。另有「彼得補充定律」：在一個機構裏，每個僱員都會升到他表面上似能勝任的職位。若周一鑊調任勞福局局長，未知是否調到他表面上似不會孭鑊的職位？