經過四年嘅磨練，黃以謙疑似學精咗，無以前咁高調話自己有興趣做局長，莫非佢今次有望入閣，所以步步為營避免「見光死」？
本身任職精神科醫生嘅黃以謙，○八年已表態有興趣做副局長，但礙於當時佢所屬嘅自由黨領導層似乎無乜反應，最後連面試機會都無。直到最近政府換屆，又有傳黃以謙有意應徵做食物及衞生局副局長，但佢今次對傳聞處之泰然，笑言呢四年嘅閱歷多咗，又話如果有人覺得佢適合，自然會搵佢喎。
話時話，黃以謙今次表現得小心翼翼，有傳係佢獲得唔少醫學界中人力撐入閣，有人亦估計佢曾經喺特首選舉中幫過唐英年，倘入閣符合「大和解」之風，至於佢今次喺各方有利因素配合下能否跑出，大家就要拭目以待喇！