政情：洪為民掌iProA 任期矇查查
菁英會主席洪為民（Witman）近日新添一項公職，就係互聯網專業協會（iProA）會長，接替提前辭任嘅鄧淑明。問Witman有乜大計，佢就笑稱仲未有打算，但首要任務係搞掂協會本身嘅問題。鄧淑明嘅原本任期到年底先完結，外界有傳佢係因為有意參選立法會而提早辭職，依家Witman中途接手，究竟到年底使唔使重選，仲係一個疑問。
Witman尋日出席福建社團活動，同一班學生分享喺IT界廿幾年嘅點滴。唔少人都覺得科技愈發達，人與人之間嘅距離就愈疏離，但Witman就覺得科技可以改善生活，只係人類有時無好好利用，先弄巧反拙啫。
Witman話，大家應該將科技視為輔助溝通嘅工具，如果善用facebook、Whatsapp等溝通工具後，非但唔會同朋友疏離，反而關係更親密，因為佢每日打開facebook，都好似同朋友見緊面咁喎。