政情：皇上為棟篤笑多「獄」念
因為去年九月衝擊遞補機制（現稱「出缺機制」）諮詢論壇，搞到被法庭判監三個星期嘅人民力量黃洋達（皇上），話咁快就坐完，尋日出獄獲四百個支持者夾道歡迎，唔少人仲送上黃玫瑰花。皇上一出獄就即時抽煙、飲可樂；又透露喺獄中為六月兩場Talk Show諗咗唔少亮點，到時一定可以令大家捧腹大笑喎。
強調絕非服從判決
皇上嘅太太陳秀慧尋日好早就到場，佢話過去幾星期都忙於幫老公處理地區辦事處及Talk Show嘅事務。雖然黃太表現得好硬淨，但當親眼見到老公重獲自由時，一樣淚眼漣漣，夠晒鶼鰈情深。皇上話今次服刑純粹係技術性工作，絕非服從判決，仲話會繼續上訴堅持唔同嘅抗爭路線。
講番皇上今次坐監，因為佢積極考慮代表人民力量參加九月立法會九龍東直選，所以佢早前決定先行服刑，避免為參選造成障礙。至於同樣被判監嘅社民連主席梁國雄，尋日亦都話會考慮放棄保釋，入冊服刑喎。