政情：福建幫終極目標做特首
候任特首梁振英（CY）將於七月上場，標誌着其家鄉「山東幫」喺政圈正式崛起，令各大社團都不敢怠慢加快培育政治人才，為未來發展打好基礎，其中以「福建幫」最為積極，四出揀蟀晒人才畀新政府挑選，以展現本身實力。不過，原來福建幫嘅目標不只於此， 終極目標係希望十至二十年後會出個福建人做特首，志向認真遠大！
CY早前成立五人遴選委員會挑選各界人才做副局長同政治助理，據聞除咗政黨係主要人才供應商外，各大社團都係主要來源之一，其中福建幫本身人多勢眾，自然有合理期望想分一杯羹。我哋日前講過，福建幫打算推薦五人名單畀新政府，當中有唔少都來自名牌大學，包括哈佛、劍橋同加州大學。福建社團聯會主席林樹哲話，依家正在挑選當中，佢對此感到好自豪喎。
許曉暉白韞六抬頭增期盼
林樹哲仲將福建幫嘅終極目標曝光，佢話香港有一百一十萬福建人，以佢嘅認知，好多都唔係太鍾意政治，以致依家好少人做官，反而專業人士較多，但咁都無損佢對福建幫嘅信心，佢極有志向希望喺十至二十年之後，可以出個福建人做特首喎。其實福建幫突然有呢個期盼，或多或少同最近呢幾年都有閩籍中人陸續喺官場抬頭有關。
盛傳係文化局局長熱門人選嘅許曉暉，○八年入官場做民政事務局副局長開始政治歷練生涯，最近眼見業界四出「倒許」，許曉暉即時展現政治手腕，接連出招展示自己同文化嘅淵源，包括尋日以觀眾身份買飛入場睇表演。此外，極可能做下屆廉政專員嘅前入境處處長白韞六，據聞亦係祖籍福建，反映福建幫已開始陸續壯大做出成績。
不過話說回頭，相信福建幫呢個終極目標喺短期內應該實現無期，至於幾時可以真正有個福建人做特首，同曾經有同鄉做特首嘅「上海幫」同「山東幫」抗衡，呢個就要密切留意福建幫未來十年發展，有無更多政治猛人冒出頭來喇！