買棵菜污水照頭淋
深水埗北河街街市污水滲漏多時，最近三個月更先後四度出現嚴重滲漏，檔販、顧客與貨物紛紛「中招」，食環署卻未有正視。區議員與關注團體批評食環署處事官僚，對管轄範圍出現問題不聞不問； 醫學界人士則警告，污水沾染食物後果嚴重，要求當局正視。
「漏到好似瀑布咁，啲菜畀污糟水淋過又唔賣得，由朝漏到晚點做生意？」北河街街市菜檔東主阿君（化名）月前已發現天花喉管滲漏，隨即聯絡街市緊急維修組，惟等候逾十二小時對方始到場，令阿君氣憤不已。「個街市都唔係第一次漏水，之前整咗啲漏斗喺度都冇用，成日係咁都唔係辦法！」
除檔販連人帶貨「中招」外，經常到上址買菜的麥太亦「中頭獎」，怒斥食環署跟進不力，「諗住去買棵菜啫，無啦啦畀污糟水照頭淋，離晒大譜！」麥太指，早在三個月前已發現街市污水喉有滲漏，令不少顧客遭污水淋至「頭又係，身又係」，怒斥食環署不負責任。
維修要等承辦商
當區區議員劉佩玉指出，北河街街市落成至今已十七年，喉管老化令滲水問題浮現，加上接報後未有即時處理，更令滲漏問題未能即時解決，「食環署收到投訴要交畀建築署，然後又等承辦商維修，點解唔可以靈活啲、快手啲？」劉認為食環署不但無視污水傳播疾病危機，僵化處事亦未能「急市民所急」。
「食環署辦事不力係人都知，外判咗就更加過分，由得外判商求其交功課，唔爆就唔補！」全港街市販商大聯盟主席黃齊偉直指食環署官僚作風多年未改，認為要解決問題食環署必先主動更換「夠期」喉管，並採用較耐用質料，保障市民及商戶利益。
污水含病毒損健康
全民健康動力主席勞永樂則警告，街市衞生情況與市民健康息息相關，污水更含有病毒及細菌，倘含有重金屬的污水一旦沾污食物，即使經洗煮亦無法洗淨，「人食咗染咗污水嘅食物，分分鐘會有腸胃炎！」勞醫生認為，如污水喉滲漏問題無法根治，食環署便應考慮拆遷街市，保障市民健康，「明知修修補補冇用，就應該諗個方法徹底解決，如果整唔好就要諗下嗰度仲係咪適合做街市！」
食環署發言人承認，上址二樓菜檔有污水喉於今年首三個月內曾四度滲漏，指每次皆即時轉介建築署安排維修，並於當日或翌日完成，其後再為其中一條污水喉進行加固工程，以防再次滴水。
記者：黃芷君、攝影：林松澧、何穎賢