開講有話，一朝天子一朝臣。新政府就快上場，正所謂新人事，新作風，照計應該清除瘀血，好似食衞局局長周一嶽呢啲庸官應該被叮走嘞啩。如果係嘅話，咁就一天都光晒，香港人終於可以脫離「每周一鑊」嘅災難日子，特區官場終於可以踢走呢件政治負資產。
可惜吖，江湖傳聞話，周一嶽可能有得翻閹，調任勞工及福利局局長喎，你話係咪開玩笑吖！
眾所周知，周一鑊，最渾噩，食衞局喺佢嘅無能領導之下，亂七八糟，本地孕婦生仔冇床位、長者安老無宿位、先人安息無龕位；病人睇病變送命、市民食嘢搵命博……盛傳佢冇得留低，好多人本來開定香檳，諗住以後有啖好食，點知家陣又傳佢會翻閹局長，對市民嚟講，等如一個噩夢結束，另一個噩夢又開始。
歌仔都有得唱喇，叮走周一鑊，全民皆快樂；留低周一嶽，港府實孭鑊。嗱，周一鑊留低喺下屆政府，唔止市民大鑊，新政府更加係大大鑊。
候任特首梁振英以民望取勝，揚言要「穩中求變、適度有為」。可惜落筆打三更，留低一件「史上最廢財爺」曾俊華，已經令新政府嘅形象打咗折扣，家陣又翻閹多一個形象破產、民望低殘嘅周一鑊，新政府仲點樣展現新氣象吖？又何來用人唯才、強政勵治吖？
咁講啦，慶父不死，魯難未已；一鑊不除，港難未已。政府新舊交替，正係掃除無能庸官、清除官場瘀血嘅最佳時機，新特首「七一」上台，若然留低咁多庸官瘀血，必然造成施政管道淤塞封閉，民望脈搏奄奄一息，未來五年管治就算唔變成跛腳鴨，都隨時痛風發作喇，施政一樣舉步維艱嘅咋。新政府唔通想步董建華同煲呔曾後塵？
嗱嗱嗱，等功夫茶提醒新政府，周一鑊唔止庸碌無能，仲私德有虧，早前被踢爆僭建醜聞，搞到屋宇署要向佢發出清拆令，你話幾咁羞家？一個知法犯法嘅「煲呔曾僭建營」中堅分子，居然留低做勞福局局長，咪話香港人難有幸福，新政府一樣冇運行㗎！
一句講晒，新政府用舊瘀血，縱不跛腳也痛風。梁振英早前以雷厲風行姿態喝停「雙非」，贏得一片掌聲，功夫茶衷心希望佢可以用呢份決心同魄力，清除官場瘀血，實施庸官零配額。你知啦，任賢勿二，去邪勿疑，如果留低呢啲低能力、低民望、低承擔嘅「三低庸官」，新政府嘅民望都幾難高得去邊，管治都幾難好得去邊㗎咋！