政情：KS聞做局長怕醜臉紅
立法會議員劉秀成尋日宴請一眾環保建築專業議會成員，去立會新大樓宴會廳共進午膳，盛會擔任下屆政府環境局局長嘅綠色建築議會副主席黃錦星（KS）亦都係座上客。劉秀成話，尋日嘅飯局幾個星期前已經約好，否認係專登帶KS事先視察立法會環境喎。
尋日劉秀成帶咗KS等人去參觀新大樓嘅綠化屋頂同其他環保設施。身為建築師嘅KS話，今次係佢首次參觀立法會，大讚大樓嘅綠化工作做得唔錯，好似大樓自然採光嘅設計，令太陽光可以透過玻璃照入室內，相信應該會節省唔少電力。不過，KS話開少啲燈唔一定環保咗，因為要睇吓實際效能係點喎。
當KS被追問七一後係咪會多啲喺立法會出現時，一直健談嘅佢突然成塊臉紅晒，仲捉住記者隻手握完又握，好明顯係怕醜唔想答做局長嘅問題啦！不過，如果KS真係做咗局長，要面對嘅尖銳問題將會陸續有來，咁怕醜點得呢？