下屆立法會將增加十個議席，班口沫橫飛嘅議員就擔心人數多咗，每人每個會期可以提出質詢嘅數目會減少，令佢哋少咗表演機會，於是要求修改議事規則，增加每次大會質詢問題數目由六條增至七條，仲話要限制官員回覆時間減到七分鐘。唔通部分議員經過今次議席出缺安排嘅「拉布」戰後嚇怕咗，所以要禁止埋官員「拉布」式冗長發言？
其實依家每項口頭質詢一般都要廿幾分鐘，好多時都係因為局長回覆質詢時嘅發言時間過長，好似食物及衞生局局長周一嶽同勞工及福利局局長張建宗咁，經常喺首輪回覆已經講咗十幾分鐘，但又唔係言之有物，反而好似係想拖延時間，令議員無時間再跟進問題。
據聞政府似乎對建議有保留，話如果議員質詢嘅篇幅好長或涉及範圍廣泛，要官員喺七分鐘內作詳細回覆可能會有困難喎。不過，議事規則委員會主席譚耀宗就話，因為有關建議係大部分議員嘅共識，所以唔再改動喎。梗係啦，建制派經常大鬧泛民主派玩拉布浪費公帑，所以點敢容許官員發言玩拉布呀！