中環出更：田二少搵葉蒨文助選？
一向交遊廣闊嘅新民黨副主席田北辰，前日畀卓妮見到佢喺銅鑼灣世貿廣場同一位高大靚女傾偈，期間仲引到靚女笑到甜絲絲添，睇真啲呢位靚女原來係天后級歌手葉蒨文（Sally）。其實兩人係相識咗十幾年嘅老友，好耐無見自然傾到雞啄唔斷，田二少仲打蛇隨棍上，約Sally打波添！
林子祥同窗兼波友
一個唱歌、一個從商兼從政，兩人應該大纜都扯唔埋，喺乜嘢因緣際遇下令兩人相識呢？原來田二少同Sally老公林子祥好熟，兩人都係拔萃男書院同學仔，由中學已經認識，之後兩人經常約埋一齊打網球，就咁識咗Sally。
其實好多從政人一到選舉，就會搵藝人幫手拉票，好似當年田二少嘅黨友葉劉淑儀回流香港參選，都搵咗「蘇絲黃」幫手，專吸家庭主婦票源。
唔知積極考慮喺新界西參選嘅田二少，會唔會搵老友Sally幫手拉票呢？