商務及經濟發展局推出《淫褻及不雅物品管制條例》檢討第二輪公眾諮詢，到底諮詢咗乜乜東東芫荽葱？功夫茶話畀大家聽，暫時而言諮詢咗一片民憤以及一輪炮轟。
不如咁啦，先睇睇發生咗乜嘢事。政府日前就條例檢討舉行第一場公眾論壇，出席嘅市民接近一半異口同聲表達不滿，猛烈批評《淫褻及不雅物品管制條例》不合時宜，八十年代沿用至今從未修訂，無法有效監管日漸普及嘅手機同埋互聯網。又有市民認為，特區官僚又懶又蠢，執法不力導致壹傳媒旗下免費報紙《爽報》肆意渲染色情資訊。
正如○六年起已經擔任淫審處審裁員嘅袁小姐質疑，政府一直冇為淫褻及不雅設下定義，令到現時嘅評審機制無所適從，主要依靠審裁員嘅個人道德標準，並無客觀準則，導致評審過程困難重重。袁小姐仲話吖，純粹加重條例嘅最高刑罰毫無意義，實際上次次只係罰款二千三千，提高幾多都冇用啦，建議增設最低刑罰以收阻嚇作用。
即係咁，盲嘅都睇到特區政府包庇縱容淫媒吖嘛，尤其係壹傳媒旗下鹹到出汁嘅《爽報》，誨淫誨盜，教壞細路，偏偏港英餘孽隻眼開隻眼閉。
根據政府嘅建議，觸犯淫褻罪行由現時最高罰款一百萬，提高至二百萬元，最高監禁年期維持三年。不雅物品方面，首次定罪罰款增至最高八十萬元，最高監禁年期維持一年，再次定罪罰款增至一百六十萬元，監禁年期最高增至兩年。表面上好似幾有牙力，不過學似審裁員袁小姐話齋，次次罰款二千三千雞碎咁多，壹淫媒之流嘅超級積犯怕你條毛咩！
《爽報》嘅鹹濕已經係公認，前排之嘛，由十八個不同團體組成嘅「反色情暴力資訊運動」做過一項調查，五份免費報之中，超過六成受訪者認為《爽報》對青少年嘅道德觀念最有負面影響。淫媒之所以能夠繼續派通街荼毒青少年，咪就係又懶又蠢嘅官僚刻意放生嘅後果囉。
除咗港英餘孽包庇縱容，仲有無良政棍保駕護航。好似曾經分別收過淫賤黎逾千萬元捐款嘅公民黨同民主黨咁吖，立法會出現民間團體公審《爽報》嘅時候，一向滿口仁義道德嘅兩黨議員居然裝聾扮啞，冇聲討，冇圍剿，冇為民請命。受人錢財，替人消災，鬼叫無良政棍收咗掩口費咩！
所以話啫，只要包庇淫賤黎嘅牛鬼蛇神繼續存在，所謂檢討《淫褻及不雅物品管制條例》都係嘥氣。或者咁啦，如果真係有外星人，不如請淫賤黎上飛碟做實驗，地球從此少一個害人精！